Edhe viti 2024 ishte një tjetër vit i suksesshëm për Shkollën Digjitale dhe franshizat e saj kudo nëpër botë, me arritje të shumta dhe zgjerim në shtete të reja, duke dëshmuar suksesin e stafit, nxënësve dhe partnerëve tanë në shumë organizime gjatë këtij viti.

Zgjerimi në lokacione të reja
Pas kërkesave të shumta dhe sukseseve përmes franshizave të Shkollës Digjitale nëpër botë, këtë vit kemi zgjeruar rrjetin në tregun e Lindjes së Mesme dhe Afrikës, me 4 pika në Arabinë Saudite, në Riyadh, Jeddah, Al Hasa dhe Taif, në Egjipt me pikën në Cairo, si dhe me pikën e re në Kosovë, në Suharekë.

Me mbi 2000 nxënës aktivë vetëm këtë vit në Kosovë, po dëshmojmë rritje të cilësisë dhe angazhimit të nxënësve tanë, si dhe po pranojmë në vazhdimësi nxënës të pasionuar për teknologjinë dhe programimin, duke ofruar mundësi më të mira dhe mësim më të personalizuar për secilin. Shkolla Digjitale vazhdon të mbetet shkolla e programimit me shtrirjen më të madhe në Kosovë, sa i përket lokacioneve dhe numrit të nxënësve.

Kemi siguruar ri-akreditimin dhe jemi ri-validuar nga Autoriteti Kombëtar i Kualifikimeve për nivelin 'Junior Programmer' për pesë vitet e ardhshme, duke konfirmuar angazhimin tonë për ofrimin e trajnimeve të standardeve më të larta.

Lansimi i platformës më inovative që bashkon lojën dhe mësimin
Për herë të parë, kemi lansuar një platformë krejtësisht inovative që kombinon lojën dhe mësimin në një aventurë për fëmijë dhe të rinj, duke u bazuar në Inteligjencë Artificiale, që do t’i ndihmojë nxënësit të zhvillojnë aftësitë e nevojshme.

Kjo platformë fantastike është krijuar për të qenë shumë fleksibël dhe mund të përshtatet lehtësisht për çdo lëndë mësimore! Qoftë për matematikë, shkencë, letërsi apo histori, lojërat dhe misionet janë të dizajnuara për të reflektuar përmbajtjen e kurrikulave të ndryshme. Lexo më shumë këtu

Rritja e pjesëmarrjes së gjinisë femërore
Në përpjekjen për të promovuar barazinë gjinore, Shkolla Digjitale ka arritur të rrisë pjesëmarrjen e gjinisë femërore në staf dhe në numrin e nxënësve. Ndërsa pjesëmarrja e femrave në staf është mbi 67%, përqindja e tyre në numrin e nxënësve është rreth 30%, duke treguar angazhimin tonë për të krijuar një mjedis të barabartë dhe mbështetës për të gjithë, si dhe për të pasqyruar diversitetin e ekipit tonë.

Me rastin e ditës së vajzave në TIK, me moton "LEADERSHIP", mirëpritëm për ditën e ‘Girls In ICT’ mbi 100 pjesëmarrëse në Shkollën Digjitale në Prishtinë për të vlerësuar dhe motivuar të gjitha vajzat në orientimin e tyre në fushën e teknologjisë. Drejtuesja e Shkollës Digjitale, Hana Qerimi, zhvilloi bisedë interaktive me pyetje-përgjigje me nxënëset tona, të cilat u informuan për mundësitë e të ardhmes së tyre në këtë profesion.

Sukseset e nxënësve
- Denis Hoti, ish-nxënës i Shkollës Digjitale në Prizren, u shpall fitues në sfidat ndërkombëtare në Austri dhe Gjermani me çmimin “Best Open Source” në një nga hackathon-et më të mëdha në Austri, "Tourism Technology Festival". Ai gjithashtu fitoi çmimin e dytë në hackathon-in 7-ditor "VGI Challenge" në Gjermani.

- Erdajt Sopjani, një nga nxënësit e parë të Shkollës Digjitale, fitoi çmimin e parë për krijimin e një pajisjeje që lexon sinjalet elektromagnetike në tru!

- Nxënësit e Shkollës Digjitale në Ferizaj dhe Tetovë fituan vendet e para në hackathonin Junction X Tirana dhe çmimin e parë në sfidën e ProCredit Bank, me projektin e tyre inovativ për menaxhimin e të ardhurave personale.

- Ekipi i vajzave nga Shkolla Digjitale në Prishtinë fitoi vendin e parë në MiketxWiSTEM hackathon me projektin "Empower Her", që synon fuqizimin e vajzave për zhvillim personal dhe profesional.

- Yll Berisha, ish-nxënës i Shkollës Digjitale në Prishtinë, përfaqësoi Kosovën në European Cybersecurity Challenge 2024 në Torino.

- Jona Kuka, nxënëse e Shkollës Digjitale në Prishtinë, u rendit në Top 20 në finalen e Olimpiadës Ndërkombëtare për STEM.

Këto janë vetëm disa nga sukseset kryesore të nxënësve dhe ish-nxënësve tanë, të cilët na bëjnë krenarë çdo ditë.

Iniciativa Sociale dhe Arsimore
Kemi organizuar për herë të parë bashke me stafin e Shkolles Digjitale në Prishtinë, konferencën për prindër “DIGITAL PARENTHOOD”, e cila mblodhi bashkë prindër, edukatorë, psikologë dhe ekspertë për të diskutuar tema të ndryshme nga fusha e sigurisë kibernetike, mediave sociale, lojërave dhe bullizmit kibernetik, shumë të nevojshme për prindërimin në epokën digjitale.

Me qëllim për të mbështetur fëmijët që kanë luftuar dhe i kanë mbijetuar kancerit, Shkolla Digjitale në Prishtinë ka ofruar 3 bursa falas për kursin e programimit për fëmijët të cilët janë pjesë e organizatës 'Action for Health', për t'i përgatitur ata për tregun e punës dhe të ardhmen e tyre të ndritur. Jemi shumë të lumtur për këtë iniciativë dhe mezi presim që së bashku me fëmijët të mësojmë dhe të zhvillojmë së bashku aplikacione inovative.

Patëm kënaqësinë të asistojmë rreth 1200 nxënës të shkollave publike, të cilët erdhën për të mësuar dhe për të provuar aftësitë e tyre në kodim gjatë një orë mësimore. Jemi të lumtur që këtë vit i është dhënë një rëndësi e madhe orës së kodimit përmes partneritetit me SHPIK dhe Ministrinë e Arsimit, Shkencës dhe Teknologjisë.

Organizuam një festë të veçantë me nxënësit që kanë përfunduar kursin në Shkollën Digjitale (Alumni), për të festuar arritjet dhe lidhjet e ngushta që kemi ndërtuar bashkë ndër vite.

Trajnimi i të rinjve të shumtë në bashkëpunim me IREX
Shkolla Digjitale, si përfituese e grantit të ndarë nga Aktiviteti i USAID-it për zhvillimin e fuqisë punëtore të udhëhequr nga sektori privat, i financuar nga USAID dhe i implementuar nga IREX, ka organizuar trajnime falas për mësimin e teknologjive më të kërkuara: Python, DevOps dhe Full Stack, ku pas përfundimit të trajnimit nxënësit do të vazhdojnë me 3 muaj praktikë për të zhvilluar aftësitë e tyre profesionale.

Gjithashtu, kemi pranuar 40 kompjuterë të rinj, të financuar nga ky Aktivitet, me qëllim të ofrimit të kushteve sa më të mira për trajnimet. Kjo mbështetje, na ka mundësuar të forcojmë dhe zgjerojmë misionin tonë për të aftësuar gjeneratat e reja në programim dhe aftësi të nevojshme për të pasur sukses në botën e sotme, ku çdo profesion është i ndërlidhur me aftësitë digjitale.

Gara Spring Code Fest
Shkolla Digjitale në Prishtinë ka organizuar garën e kodimit Spring Code Fest, ku gjithsej kanë aplikuar mbi 300 nxënës nga franshizat e Shkollës Digjitale në Kosovë dhe Maqedoni, duke na bërë shumë të lumtur dhe krenarë për projektet e tyre të suksesshme, të cilat i prezantuan.

Me vlerësimin e jurisë së përbërë nga kompanitë Sentry Cybersecurity, Trampolinë dhe Shkolla Digjitale, në një ceremoni të ndarjes së çmimeve, kemi shpallur fituesit e kësaj gare:
- Arba Hamiti, në kategorinë CODE
- Avdyl Zeqiri, në kategorinë Scratch
- Kaon Krasniqi, në kategorinë Wordpress Basic
- Jon Mehmeti, në kategorinë JavaScript
- Fion Mustafa, në kategorinë Python
- Elsa Halili, në kategorinë Front End
- Tarik Ajvazi, në kategorinë Web Development
- Donjeta Ramadani, në kategorinë React Native

Shkolla Verore
Gjatë muajve Korrik dhe Gusht, Shkolla Digjitale ka organizuar programin më të veçantë veror dy javor, për grup moshat 8-18 vjeç me një planprogram me fushat më atraktive të teknologjisë, të gjitha në një paketë: inteligjenca artificiale, arkitektura kompjuterike dhe softuerike, siguria kibernetike, ndërmarrësia, zhvillimi i lojërave 3D, sportet elektronike dhe transmetimet 'online', programimi për smart houses, dizajn 3D.

Në program ishin të përfshira edhe: qëndrimi tërë ditor me ushqim dhe pije, mësim me instruktorë të kualifikuar, aktivitete në natyrë, tournamente të ndryshme, vizita në kompani si dhe guest speaker.

Programi veror edhe kete vit ishte shume argetues per nxenes te shumte te cilet ishin pjese e Shkolles Verore, duke krijuar se bashku momente te paharrueshme.

Champion Trials Hackathon: 48-hour challenge
Gjatë muajit nëntor u mbajt gara e kodimit "Champion Trials Hackathon", e cila përfundoi me sukses pas dy ditëve intensive plot kreativitet dhe ide mbresëlënëse nga nxënësit tanë. Më shumë se 500 finalistë nga të gjitha franshizat e Shkollës Digjitale në Kosovë, Shqipëri dhe Maqedoni morën pjesë në këtë ngjarje të madhe, duke garuar në kategori të ndryshme.

Në finalen e "Champion Trials Hackathon", prezantuan 37 finalistë, projektet e të cilëve u vlerësuan nga juria e Shkollës Digjitale në Slloveni, e cila shpalli fituesit:
- Shpat Kryeziu - Speedsters, Shkolla Digjitale Prishtinë
- Leart Obertinca - Shadows, Shkolla Digjitale Prishtinë
- Rrita Canolli - Hipsters, Shkolla Digjitale Prishtinë
- Flori Ollogu - Engineers, Shkolla Digjitale Dibër

Njohja e suksesit përmes vizitave, çmimeve, mediave dhe revistave prestigjioze
- Sukseset e Shkollës Digjitale dhe StarLabs janë prezantuar në një artikull në një nga revistat më të njohura norvegjeze, Aftenposten Innsikt: "Kosova është bërë një shembull i fuqishëm i inovacionit dhe zhvillimit në Ballkan, përmes nismave si Shkolla Digjitale dhe StarLabs, duke kontribuar në formimin e gjeneratave të reja të profesionistëve të teknologjisë si dhe duke sjellë inovacion dhe mundësi punësimi për shumë talente.”

- Drejtuesit e Shkollës Digjitale dhe StarLabs patën kënaqësinë të takohen në një drekë pune me sipërmarrësin dhe liderin e teknologjisë, Eyal Waldman nga Izraeli, me ftesë nga Ministrja e Ekonomisë, Artane Rizvanolli.

- Hana Qerimi fitoi çmimin 'Young Woman Entrepreneur' për Ballkanin Perëndimor.

- Kryetari i Bashkisë së Tiranës mirëpriti dhe shprehu përkrahjen e tij për aktivitetet e Shkollës Digjitale.

- Hana Qerimi ishte pjesë e panelit në Startup Ecosystem Experts Insights këtë vit në Tiranë, ku u diskutua mbi rëndësinë e fondeve investive për startupe si dhe ndikimin e tyre në avancimin e ekosistemit të startupeve në Europën Juglindore.

- Darsej Rizaj përfaqësoi Shkollën Digjitale në Konventën e Franchising Corporation Berlitz 2024 në Cartagena, Kolumbi, e cila ishte një mundësi e shkëlqyer për të lidhur kontakte dhe për t'u bashkuar me liderë frymëzues nga e gjithë bota, duke ndihmuar në formësimin e së ardhmes së arsimit.

- Hana Qerimi ishte gjithashtu pjesë e takimit të organizuar nga USAID dhe Misioni i Kosovës në Poloni, ku morën pjesë 14 biznese dinamike kosovare që patën mundësi të diskutojnë për bashkëpunimin me sipërmarrës polakë për të eksploruar mundësi të reja të tregut dhe investimeve.

Përmes stafit dhe nxënësve tanë, kemi qenë të përfshirë në mënyrë aktive në gara, organizime dhe konferenca të rëndësishme vendore dhe ndërkombëtare.

Puna ekipore dhe profesionale e stafit
Një ndër pikat më të rëndësishme prapa suksesit të jashtëzakonshëm është puna ekipore dhe profesionale e stafit tonë. Ne ju falënderojmë të gjithë juve për partneritetin dhe mbështetjen tuaj të vazhdueshme edhe këtë vit, duke qenë pjesë e rëndësishme e jona, në veçanti stafin e Shkollës Digjitale, të gjithë partnerët, nxënësit dhe prindërit për besimin e tyre.

Në shenjë mirënjohje për punën e tyre, të gjithë punëtorët e Shkollës Digjitale me mbi tri vite pjesë e kompanisë, kanë shijuar një udhëtim të paharrueshëm falas në Vienë.

Ne falënderojmë të gjithë për partneritetin dhe mbështetjen e vazhdueshme edhe gjatë vitit 2024, duke qenë pjesë e rëndësishme e jona, në veçanti stafin e Shkollës Digjitale, të gjithë partnerët, nxënësit dhe prindërit për besimin e tyre.

Mundësia e ndjekjes së kursit online
Shumë nxënës nga Kosova, Shqipëria, Maqedonia, Amerika dhe jo vetëm, janë bërë pjesë e kursit të programimit falë mësimit online. Pjesë e këtij komuniteti të madh online janë edhe nxënës të cilët jetojnë në zonat rurale dhe vendet përreth qyteteve të mëdha, duke pasur mundësi të kyçen online kudo që ndodhen.