Një nga iniciativat më të mëdha edukative për Inteligjencën Artificiale në vend është realizuar me sukses në Prishtinë, duke përfshirë rreth 50,000 nxënës, 700 mësimdhënës dhe mbi 1000 orë të mbajtura nga të gjitha shkollat publike të qytetit.

Programi AI Literacy u realizua nga Shkolla Digjitale, në bashkëpunim me Drejtorinë e Arsimit të Komunës së Prishtinës, me qëllim që nxënësit nga klasa e parë deri në të dymbëdhjetën të njihen me konceptet bazë të Inteligjencës Artificiale dhe ndikimin e saj në mësim dhe në jetën e përditshme.

Ky program u zhvillua si iniciativë me karakter të plotë social dhe edukativ, e organizuar dhe implementuar e gjitha nga Shkolla Digjitale, ndërsa pjesëmarrja e shkollave dhe nxënësve ishte pa pagesë.

Gjatë sesioneve interaktive, nxënësit patën mundësi të kuptojnë se çfarë është Inteligjenca Artificiale, si funksionon, ku përdoret dhe si mund ta ndihmojë procesin e mësimit për ta bërë atë më të personalizuar, më interaktiv dhe më efektiv. Programi u përshtat sipas grupmoshave duke e bërë përmbajtjen të kuptueshme dhe praktike për secilin nivel.

Një rol kyç në realizimin e kësaj iniciative patën 700 mësimdhënës të shkollave publike nën udhëheqjen e Drejtorisë së Arsimit të Komunës së Prishtinës, të cilët bashkëpunuan ngushtë me ekipin dhe instruktorët e Shkollës Digjitale në zhvillimin e sesioneve dhe aktiviteteve mësimore rreth AI. Ky bashkëpunim i drejtpërdrejtë mes mësimdhënësve dhe ekspertëve tanë mundësoi shtrirjen e programit në të gjithë rrjetin e shkollave publike të Prishtinës.

Përfaqësues të Shkollës Digjitale theksojnë se qëllimi i iniciativës nuk ishte thjesht prezantimi i një trendi teknologjik, por ndërtimi i një baze të hershme ku nxënësit mësojnë të kuptojnë, analizojnë dhe përdorin Inteligjencën Artificiale me vetëdije dhe përgjegjësi.

“AI tashmë është pjesë e realitetit tonë. Ne besojmë që çdo nxënës duhet të ketë njohuritë bazë për të kuptuar se si funksionon dhe si ndikon në të ardhmen e edukimit dhe profesioneve. Me këtë iniciativë kemi arritur të sjellim edukimin për Inteligjencën Artificiale te rreth 50,000 nxënës dhe 700 mësimdhënës në qytetin e Prishtinës,” thuhet nga ekipi organizues.

Kjo nismë konsiderohet si hapi më i rëndësishëm deri më tani drejt përgatitjes së gjeneratës së re për epokën e AI-së dhe zhvillimet e shpejta teknologjike, duke vendosur një model bashkëpunimi ndërmjet institucioneve arsimore dhe sektorit të inovacionit.

Me përmbylljen e programit AI Literacy në Prishtinë, Shkolla Digjitale ka paralajmëruar se iniciativa të ngjashme do të vazhdojnë edhe në të ardhmen, me synim zgjerimin e edukimit teknologjik në shkallë edhe më të gjerë.