Liderët e bizneseve më të mëdha në Zvicër vizitojnë Shkollën Digjitale dhe StarLabs

Sot patëm nderin e veçantë të mirëpresim për vizitë delegacionin e udhëheqësve të bizneseve të mëdha zvicerane të përbërë nga: Avni Orllati, drejtor i Groupe Orllati; Sebastien Lamuniere, drejtor i Edipresse Groupe SA; Pierre Lamuniere, drejtor i Lamuniere Holding SA; Jean-Marc Probst, kryetar i Probst Group Holding SA dhe Pierre-Marcel Favre nga Editions Favre. Gjatë kësaj vizite, drejtuesit e Shkollës Digjitale dhe StarLabs, Hana Qerimi dhe Darsej Rizaj, i prezantuan delegacionit ambientet e të dy kompanive si dhe ndanë rrugëtimin e tyre nga fillimet e kompanive deri te sukseset e mëdha ndërkombëtare si dhe planet për të ardhmen. Po ashtu, ata ndanë përvojën e tyre ndër vite në aftësimin e fëmijëve dhe të rinjve të grupmoshave 8-18 vjeç përmes kursit të programimit si dhe krijimin e mundësive të punësimit dhe mbështetjes së avancimit në karrierë në fushën e teknologjisë informative.

Shkolla Digjitale dhe StarLabs synojnë të zhvillojnë një gjeneratë të re ekspertësh të teknologjisë, të cilët mund të japin kontribute të rëndësishme në industrinë e kësaj fushe, duke mbështetur inovacionin dhe zhvillimin e saj. Ata gjithashtu theksuan përkushtimin e tyre për të promovuar rritjen profesionale dhe për të ndihmuar në zhvillim e gjeneratave të reja, duke shërbyer si mentorë dhe udhërrëfyes. Takimi u fokusua gjithashtu në ndikimin e thellë të Inteligjencës Artificiale teksa bota vazhdon të përjetojë zhvillime të jashtëzakonshme në këtë drejtim. Delegatët ndanë pikëpamjet e tyre në atë se si Inteligjenca Artificiale po transformon fusha të ndryshme të jetës dhe industri të shumta. Ndarja e pikëpamjeve jo vetëm që ndihmoi në një kuptim më të thellë të avantazheve dhe vështirësive që mund të hasen, por gjithashtu u theksua edhe rëndësia e avancimit të përgjithshëm në këtë fushë. Para delegacionit u prezantuan po ashtu projekte profesionale të realizuara nga nxënësit e Shkollës Digjitale me ç'rast u diskutua edhe e ardhmja arsimit dhe teknologjisë në përgjithësi që po evoluon çdo ditë e më shumë.