Bashkëthemeluesit dhe drejtuesit e Shkollës Digjitale dhe StarLabs, Hana Qerimi dhe Darsej Rizaj, kanë qenë të ftuarit special në Terminal Podcast të Radio Urban FM, ku ndanë me dëgjuesit historitë frymëzuese të dy kompanive duke filluar nga themelimi i tyre, edukimi i fëmijëve nga mosha 8 deri në 18 vjeç në fushën e programimit, përkrahja dhe punësimi i programerëve, ndikimi në këtë sektor në nivel vendor e deri te suksesi dhe bashkëpunimi në nivel ndërkombëtar.

Fillimisht, ata treguan lidhur me hapat e parë drejt themelimit të Shkollës Digjitale shtatë vite më parë që ka filluar si ide për të krijuar një kurs për fëmijë dhe të rinj ku do të mësonin gjuhë programuese, ide e cila nisi me një buxhet nga kursimet e tyre dhe ndihma e familjarëve, gjithmonë me qëllimin që të zhvillohet një shkollë me përmasa sa më të mëdha.

“Në atë kohë, e kemi parë mungesën e madhe të programerëve në Kosovë, prandaj ideja jonë ishte që të krijonim një shkollë në të cilën fëmijët e moshave të hershme do të mund të mësonin rreth teknologjisë dhe programimit, prandaj filluam me kampanja të vetëdijesimit rreth mësimit të programimit ku nxënësit e parë filluan të tregonin rezultate të suksesshme me zhvillimin e aplikacioneve të tyre”, tha Hana.

Një nga faktorët kyç të suksesit të Shkollës Digjitale dhe StarLabs ishte strategjia e qartë e biznesit si dhe aftësia për të ndërtuar një ekip të fortë dhe të përkushtuar, dhe kjo bëri që kompanitë e tyre të jenë inovative dhe të ofronin zgjidhje cilësore për klientët.

Gjatë intervistës, u përmend edhe një arritjet më të mëdha për të dy kompanitë, eksperienca si pjesë e delegacionit të Presidentes së Republikës së Kosovës, Vjosa Osmani në Parlamentin Evropian, e cila i ka bërë jehonë rrugëtimit të suksesshëm të Shkollës Digjitale dhe StarLabs. Kompanitë tona ishin pjesë e delegacionit që përfaqëson më së miri vendin tonë me historinë e tyre dhe suksesin ndërkombëtar duke kthyer startup në marka globale me mbi 500 vendndodhje në mbarë botën si dhe duke bërë Kosovën lider në rajon si qendër teknologjike.

Ata njoftuan edhe lidhur me organizimin e Shkollës Verore për fëmijë, si kërkesë e prindërve dhe të rinjve për angazhime dhe aktivitete kreative për të shijuar në maksimum pushimet verore. Shkolla Digjitale përmes programit veror, ofron mësimin e fushave më aktuale si inteligjenca artificiale, siguria kibernetike, ndërmarrësia, zhvillimi i lojërave 3D, sportet elektronike dhe transmetimet 'online'.

“Gjatë Shkollës Verore, fëmijët mësojnë edhe lidhur me konceptet kryesore të Inteligjencës Artificiale, aplikimet e saj në jetën reale, si dhe funksionimin e trendeve të reja si: ChatGPT, Midjourney, Smart Tools, etj, me qëllim që t'i shfrytëzojnë ato për nevoja të tyre. Po ashtu, ata mësojnë si të trajnojnë inteligjencën artificiale për të luajtur lojëra të ndryshme”, shtoi Darsej lidhur me planprogramin e Shkollës Verore.

Nga rrugëtimi i tyre fillimisht të vështirë, tek sukseset e tyre të mëdha vendore dhe ndërkombëtare, Hana dhe Darsej janë sot histori frymëzimi për shumë njerëz të tjerë që dëshirojnë të ndjekin pasionin e tyre dhe të ndërtojnë një të ardhme të ndritur në botën e teknologjisë.

Ndiqni intervistën e plotë këtu: Intervista